ПОДЕЛИТЬСЯ
Қазақстанда Қазақ тілінің ұлттық сөздік қорын құру жоспарланып отыр. Тиісті жобаны Ғылым және жоғары білім министрлігі әзірледі,- деп хабарлайды Tengrinews.kz тілшісі.
Құжатқа сәйкес,ұлттық сөздік қоры академиялық және аударма сөздіктер,Қазақ тілінің ұлттық корпусы,терминологиялық база және әртүрлі форматтағы деректер жиынтығын қамтитын дата-сеттер негізінде қалыптастырылады.
"Жобаның маңызды аспектісі – Қазақ тілінің ұлттық сөздік қоры ашық қолжетімді мемлекеттік ақпараттық жүйе болатыны. Бұл оны білім беру және ғылыми мақсаттарда,сондай-ақ қазақ тілін өңдеу технологияларын дамыту үшін барынша тиімді пайдалануға мүмкіндік береді",– делінген құжатта.
Қазіргі ережелерде мынадай негізгі ұғымдар пайдаланылады:
Генерация – деректер мен алдын ала белгіленген ережелер негізінде жаңа контентті (мәтін,сурет,дыбыс) автоматты түрде жасау процесі;
Жасанды интеллект (ЖИ) модельдері – қазақ тіліндегі деректерді өңдеу технологиялары мен алгоритмдерін түрлі жүйелерге,қосымшаларға немесе платформаларға енгізу процесі.
Ұлттық сөздік қорын қалыптастырудың мақсаттары:
Қазақ тілін мәдени құндылық ретінде сақтау,қорғау және дамыту;
Мемлекеттік тіл мәртебесін нығайту;
Қазақ тілінің барлық қолдану салаларын қамтитын ресурстарды жинақтау;
Қолданыстағы лексикалық құрамды жүйелеу,цифрландыру және генерациялау;
Қазақ тілін жасанды интеллектке және заманауи технологияларға бейімдеу;
Тілдік деректерді өңдеу үдерістерін автоматтандыру.
Жоба "Ашық НҚА" порталында 2025 жылдың 19 наурызына дейін қоғамдық талқылау үшін орналастырылған.
